Статуси

За да го проверите статусот на вашето барање за државјанство, потребно е на веб-страната на дирекцијата за бугарско државјанство да го внесете вашиот број на молба и ПИН. 

     Вкупното времетраење на целата процедура и сите статуси заедно, од првичното подавање на документи во бугарските институции до добивањето на државјанство, моментално се движи  околу 3 години.

Преписката е нередовна. [....] или Констатирани нередовности: [.....]
[Нередовна / Дополнителна] Статус кој се појавува доколку ви недостасуваат документи или доколку нешто не е во ред со документите кои ги имате поднесено. На местото на [.....] е објаснето што точно не е во ред и е наведен рок од двa или три месеци во кој треба да ги доставите бараните документи во Министерството на правосудство заедно со молба за дополнување на документи во вашето досие. Статусот може да се јави во првите неколку недели по интервјуто или пак да се јави при понатамошните проверки непосредно пред да преминете на статус [Финална] или додека сте на статус [Финална]. Набргу откако ќе ги доставите документите што се бараат, ќе бидете вратени на претходниот статус. Доколку не ги отстраните нерегуларностите во предвидениот рок, барањето ќе ви биде прекинато со заповед на министерот или ќе добиете отказ од Советот за државјанство.

Приета молба с входящ N:XXX/20XX/XX.XX.20XX г. XX:XX 

[Примена] Овој статус се појавува доколку барањето за државјанство го поднесувате преку некое конзуларно претставништво на Република Бугарија во странство. Конзуларното претставништво ги испраќа вашите документи преку дипломатска пошта до Министерството за правосудство на Република Бугарија, каде треба да се оформи/образува вашето досие/преписка, со што официјално ја започнувате процедурата за барање на државјанство. Статусот вообичаено трае неколку недели, а откако вашите документи ќе пристигнат во Министерството за правосудство и успешно ќе биде оформено вашето досие, ќе преминете на статус [Образувана].

Образувана преписка N:XXX/20XX/XX.XX.20XX г. 
[Образувана] Статус кој означува успешно оформено досие од вашето барање за државјанство. Доколку барањето го имате поднесено во Министерството за правосудство во Софија, тогаш истиот се јавува на денот на интервјуто. Доколку пак барањето го поднесувате преку некое конзуларно претставништво на Република Бугарија во странство, овој статус ќе се појави кога вашите документи ќе стигнат во Министерството за правосудство во Софија и вашето досие/преписка ќе биде оформено/образувано. Статусот вообичаено трае од неколку дена до некоја недела, по што преминувате на статус [Задолжителна].

Образувана преписка N:XXX/20XX/XX.XX.20XX г. Преписката се намира в процедура по задължително съгласуване.
[Задолжителна] Во оваа фаза, вашето барање за државјанство и вашите документи се разгледуваат од повеќе институции во Бугарија (МВР, национална агенција за безбедност,...) кои треба да се произнесат по него. По завршувањето на овие проверки, вашето барање повторно се враќа кај службениците експерти во дирекцијата за Бугарско државјанство кои треба да го проследат до Советот за државјанство на конечно одлучување. 

По преписката Ви предстои да бъде извършен финален експертен преглед преди да бъде разгледана от Съвета по гражданство.

[Финална] Вашето барање за државјанство има поминато низ задолжителните позадински проверки и моментално се наоѓа на конечно разгледување за евентуални недостатоци кај службениците експерти во дирекцијата за Бугарско државјанство. 

Доколку нешто не е во ред со вашето барање или ви недостасуваат документи, може да бидете префрлени на статус [Нередовна] додека не ги отстраните недостатоците. 

Доколку се е во ред со вашите документи, барањето ќе ви биде проследено до Советот за државјанство, кој треба да ја донесе конечната одлука. Барањата кои успешно го поминале конечниот експертен преглед и се проследени до Советот за државјанство, најчесто се одобруваат и преминуваат на статус [Положително].

Во некои случаи, Советот за државјанство може да одлучи да започне процедура за дополнително вештачење на автентичноста на вашите документи, во кој случај ќе преминете на статус [Дополнителна со запирка]. 

Преписката е разгледана от Съвета по гражданството. Извадена е за допълнителна проверка, [.....]

[Дополнителна со запирка] Поради зачестените измами со неавтентични документи (стари документи, изводи од матична книга, уверенија за неосудуваност,...), Советот за државјанство одлучил да отпочне процедура за дополнително вештачење на автентичноста на вашите документи. Станува збор за процес кој вообичаено трае неколку месеци, каде преку соработка со државата која ги издала документите и соодветното конзуларното претставништво на Бугарија во таа држава, се утврдува дали навистина станува збор за оригинални документи.

Молбата ви е разгледана от Съвета по гражданство с положително становище Документите са изпратени за издаването на указ на Вицепрезидента на Република България.

[Положително] Барањето за државјанство ви е одобрено од Советот за државјанство и се чека на потпис од вицепретседателот на Бугарија, кој треба официјално со указ да ве прогласи за државјани на Република Бугарија. Доколку е се во ред со вашето барање, нареден и последен статус ќе ви биде некој од двата статуси [Указ], во зависност од тоа каде сте побарале да го подигнете државјанството. Исклучок од ова правило може да настане доколку вицепретседателот реши да се наврати на разгледување на вашето барање, во кој случај ќе преминете на привремен статус на проверка од вицепретседтелот.

 

Резервиране на дата за получаване на удостоверение.
 

[Указ]  Честитки !  Ова значи дека вашето барање за државјанство е и официјално вклучено во указ потпишан од вицепретседателот, со што станувате државјанин на Република Бугарија. Потребно е да резервирате термин за подигање на уверението за доделено државјанство во Министерството на правосудство во Софија, со внесување на бараните податоци и прикачување на скенирана копија од пасошот. При подигнувањето на уверението, ќе треба да приложите личен документ, потврда за платена такса од 50 лв. и две актуелни ваши слики за документи. Повеќе информации можете да најдете на веб-страната на Министерството за правосудство или на следниов линк.

Вашето удостоверение е изпратено в консулска служба XXXXX-XXXXX. При получаване на удостоверението следва да заявите адрес за регистрация в Република България, както и да представите 2 бр. актуални снимки паспортен формат.
[Указ]  Честитки !  Ова значи дека вашето барање за државјанство е и официјално вклучено во указ потпишан од вицепретседателот, со што станувате државјанин на Бугарија. Уверението за доделено државјанство ви е испратено во соодветната амбасада или конзулат каде што го имате поднесено. Јавете се во амбасадата или конзулатот да се распрашате дали е пристигнато и што точно треба да направите.

Съветът по гражданство не е уважил молбата [.....].
[Отказ] Вашето барање е одбиено од Советот за државјанство. На местото на [.....] во статусот треба да е наведена причината поради која сте одбиени. Најчесто советот ги одбива барањата за државјанство во кои недостасува цврст доказ за бугарско потекло или пак барања за кои некоја од инситуциите низ кои се врши позадинска проверка се изјаснила негативно. Еднаш кога одлуката на Советот ќе се донесе, не постои можност да доставите дополнителни документи и да го вратите барањето на повторно разгледување. Не постојат ниту правни механизми со кои што може да ја промените одлуката. Доколку сметате дека неправедно сте одбиени, единствено решение е процедурата да ја почнете од почеток и одново да поднесете барање за државјанство со претходно закажување на термин за интервју во Министерството на правосудство во Софија или во некое конзуларно претставништво на Бугарија низ светот. 

Проверка от Вицепрезидента на Република България.
[Вицепретседател] Овој статус може да се јави откако Советот за државјанство ќе донесе позитивна одлука по вашето барање и означува дека се извршува дополнителна проверка од страна на тимот во кабинетот на вицепретседателот на Бугарија. Доколку вицепретседателот не го дели мислењето на Советот за државјанство, има дискреционо право да ви даде отказ. Најчесто на проверка кај вицепретседателот завршуваат барања во кои нема доволно цврсти докази за бугарско потекло, а кои од некоја причина, на пример различно толкување на законот, го поминале филтерот на Советот за државјанство.

Отказ на Вицепрезидента на Република България. [.....]
[Отказ] Барањето за државјанство ви е одбиено од вицепретседателот на Република Бугарија. На местото на [.....] може да е наведена причината зошто сте одбиени.

Молба с входящ N:XXX/20XX/XX.XX.20XX г. ХХ:ХХ е прекратена със заповед ЛС-ХХ-ХХХ/ХХ.ХХ.20ХХ 
[Прекратена] Барањето ви е прекратено со заповед на министерот на правосудство, најверојатно поради неотстранети нередовности.

Преписката се намира в състояние, за което не се предоставя информация.
Нема информации за бројот на преписка што го проверувате, станува збор за завршено барање.

Вече сте получили удостоверение по тази преписка.
Барањето е одобрено и веќе имате подигнато уверение за истото, станува збор за завршено барање.

Липсват данни.
Внесувате грешен број на молба или ПИН.

Няма такава преписка заведена по консулски път.
Внесувате грешен број на преписка. Доколку имате аплицирано директно во Софија, користете го горното поле со број на молба и ПИН.

Авторите не гарантираат за точноста на информациите презентирани на оваа страница и се оградуваат од било какви последици кои можат да настанат како резултат на користењето на информациите од страна на посетителите. Изнесените информации се исклучиво од информативен карактер и се срочени врз основа на колективни искуства околу процедурата за добивање на бугарско државјанство кои можат да се најдат на интернет мрежата. Изнесените информации на оваа страница НЕ ПРЕТСТАВУВААТ официјални ставови на било која институција на Република Бугарија.

Како ЕДИНСТВЕНИ РЕЛЕВАНТНИ ИЗВОРИ околу процедурата за добивање на бугарско државјанство треба да се сметаат ЗАКОНИТЕ НА РЕПУБЛИКА БУГАРИЈА  (Законот за бугарско државјанство, Законот за бугари кои живеат надвор од границите на Бугарија и соодветните правилници за нивно спроведување), како и соопштенијата и уредбите на институциите вклучени во процесот за придобивање на државјанство (Извршителната агенција за бугари во странство и Министерството за правосудство).

Превземањето на содржини од оваа страница во дел или целост е дозволено доколку се наведе линкот или веб-адресата на страницата како извор.